ثلاثي الفرسان غير الشجعان

كان يا مكان، ماشي قديم بزاف في الزمان، ثلاثة ديال الصحفيين يصحاب ليهم شجعان، الأول كانوا ينعتوه الزملاء ديالو في الخدمة بالفنيان، والثاني عزيز عليه الغلمان، أما الثلاث فكان مول الجورنان، وعلى اللعب الخايب مع العيالات ديما لهفان.

واحد العشية مشاو لواحد لكوان عند عشيرهم لبارمان باش ينشطو ويناقشو ويخططو لدواير الزمان.

شوية هضر مول الجورنان وقال : “دابا من بعد ما دوزنا الحبس وستافدنا من العفو الملكي. أش بان ليكم نتعاونو مع الإخوان ونردو للحكومة عمي بن كيران، حيت كان تيتهلا فينا مزيان”.

نقز حبيب الغلمان وقال :”ولكن بن كيران را مخاصم مع العدل وإحسان لي فيها خونا وحبيبنا مول الكبوط با حسان، وما فينا ما يخسر هاد القصة ديال التضامن بدون شرط ولا أي بلان”.

بعد تفكير طويل تكلم الفنيان وقال ليهم :”أنا غير خليوني في التيقار، راني مرتاح مع صحافة الاستقصاء، واخا ما عمرني كتبت شي مقال مزيان فشي جورنان، حيت في لول ولخر مجرد جبان”.

تنهد مول الجورنان وقال :”أنا عندي بلان! آش بان ليكم نوليو معارضين آخر الزمان، را فيها طرف الخبز وما محتاجة لا تبيع ولا تشري في الكتان”.

تكلم عشير الغلمان وقال :”وأنا كيف ندير للمعارضة وأنا مجرد ترجمان، ما قاد نرجع للبلاصة لي فيها دغيس فرحان”.

تحلو العينين للفنيان وقال ليهم :”آش بان ليكم نتشاورو مع با علوان…راه فايتنا في الضومين وبكثرة الهضرة طاحو ليه السنان، ويقدر يعطينا شي بلان مزيان بحكم تجربتو وتعاونو مع الجيران”.

فرحوا بثلاثة وقالوا:” حتى هذا بلان ويستاهل تقرقيب الكيسان”.

بلا تردد ولا تمنان، مول الجورنان جبد التيليفون وعيط لبا علوان.

مول الجورنان : ألو

با علوان : ويم. ج : اهلا السي علي القلم الفنان

ب. ع : السي توفيق هذا، كيف راك؟ وباركة من الملاغا، أنا قلمي غير عيان

م. ج : كيف عامل مع هاد النسيان ؟

ب. ع : هاد الساعة ما كاين نسيان راني على اتصال مع الكابران وديما مجمع اغناسيو سمبريرو وفرانسيسكو كاريون وحتى كويرتان لي جراو عليه من جورنان “Marianne”.

م. ج : مزيان. إوا السي علي، بغيناك في واحد الخديمة ومحتاجين تورينا وتعلمنا مبادئ المعارضة والعصيان، ولكن بشرط حتى واحد ما يرد لينا البلان.

ب. ع : السي توفيق هاد الشي خاصو جلسة في شي مكان ونقادو الخطة باش كلشي يمشي مزيان…ولا كنتي زربان ما عليك إلا تلونصي شي بودكاست في اليوتيوب، راه تقدر تتكلم وتبان وأراك للتحليلات السياسية الخاوية والتقلاز من تحت الجلابة وحتى الحشيان”.

م. ج : شكرا بزاف صديقي الفنان.

بعد ما قطع الاتصال وتحلو ليه العينين مزيان بسبب فكرة با علوان، قال مول الجورنان :”دابا أ الاخوان بعد ما لقيت البلان ونتوما ما بغيتو ولاو، أش بان ليكم كل واحد يعترف بفضيحتو ونتصالحو مع الناس ويتطوا هاد الفيلم ويغبر مع النسيان”.

“أنا بعد، غادي نبدا أنا لول”، يضيف مول الجورنان، “صراحة أنا كنت تنعس مع العيالات والبنات لي كانو خدامين عندي غير باش نتعاون معاهم على الزمان”.

تكلم الترجمان وقال : “أودي أنا غير تغريت مع داك الدري والله ينعل الشيطان”.

وختم الفنيان الكلام وقال :”أنا را نعست مع ديك البنت عن طيب خاطر أ العشران…وما كان لا غوات لا جران”.

تجدون أسفله الكلمات المفتاحية لكل غاية مفيدة:

مول الجورنان : توفيق بوعشرين

الترجمان : سليمان الريسوني

الفنيان : عمر الراضي

با علوان : علي المرابط